A chantar m’er de so qu’ieu non volria tan me rancur de lui cui sui amia, car ieu l’am mais que nuilla ren que sia: vas lui no .m val merces ni cortesía ni ma beltatz ni mos pret ni mos sens, c’atressi .m sui enganad’e trahïa com degr’ esser, s’ieu fos desavinens. D’aisso.m conort car anc.non fi faillenssa, amics, vas vos per nuilla captenenssa, anz vos am mais non fetz Seguis Valenssa, e platz mi mout quez eu d’ámar vos venssa lo mieus amics, car etz lo plus valens mi faitz orguoill en ditz et en parvenssa, e si etz francs vas totas autras gens. Be .m meravill com vostre cors s’orguoilla amics, vas me, per qu’ai razon qu’ieu .m duoilla; non es ges dreitz c’autr’amors vos mi tuoilla per nuilla ren qu’ie .us diga ni acuoilla; e membre vos cals fo .l comenssamens de nostr’amor! Ja Dompnedieus non vuoilla qu’en ma colpa sia .l departimens. Proesa grans qu’el vostre cors s’aizina e lo rics prtez qu’avetz m’en ataïna, c’una non sai, loindana ni vezina, si vol amar, vas vos non si’ aclina; mas vos, amics, etz ben tan conoissens que ben devetz conoisser la plus fina, e membre vos de nostres covinens. Valer mi deu os pret e mos partages e ma beltatz e plus mos fis coratges, per qu’ieu vos mandad lai on es vostr’ estatges esta chansson que me isa messatges: ieu vuoill saber, lo mieus bels amics gens, per que vos m’etz tanta fers ni tant salvatges, non sai, si s’es orguoills o maltalens. Mas aitan plus vuoill li digas messatges, qu’en trop d’orguoills o ant gran dan maintas gens.